ជប៉ុន៖ ភេសជ្ជៈដែលមានជាតិស្រវឹង (Alcoholic beverages) នឹងត្រូវហាមឃាត់មិនឱ្យមាននៅក្នុងទីតាំងនៃការប្រកួតកីឡាអូឡាំពិកទីក្រុងតូក្យូ នាខែក្រោយនេះឡើយ ដោយការសម្រេចបែបនេះដើម្បីធានាទំនុកចិត្តដល់សាធារណជនទាំងឡាយថាព្រឹត្តិការណ៍អូឡាំពិកទីក្រុងតូក្យូ ២០២០ ដែលលើកមកឆ្នាំ២០២១នេះ គឺជាព្រឹត្តិការណ៍កីឡាដែលមានសុវត្ថិភាពខ្ពស់បំផុត។ នេះបើតាមការប្រកាសរបស់លោកស្រី Seiko Hashimoto ប្រធានអូឡាំពិកទីក្រុងតូក្យូ។ 

នៅក្នុងសន្និសីទសារព័ត៌មាននោះ លោកស្រី Hashimoto ក៏បានបញ្ជាក់ថា ក្រុមហ៊ុន Asahi ដែលជាក្រុមហ៊ុនស្រាបៀរធំបំផុតមួយរបស់ជប៉ុន និងជាម្ចាស់ឧបត្ថម្ភធំក្នុងព្រឹត្តិការណ៍អូឡាំពិកនេះ មិនបានជំទាស់ឡើយ ព្រមទាំងយល់ព្រមទៅលើសេចក្តីសម្រេចនេះផងដែរ។

គួរបញ្ជាក់ថា ព្រឹត្តិការណ៍អូឡាំពិកឆ្នាំ២០២០ នៅទីក្រុងតូក្យូ នឹងចាប់ផ្តើមការប្រកួតនៅថ្ងៃទី២៣ ខែកក្កដា ដល់ថ្ងៃទី០៨ ខែសីហា ឆ្នាំ២០២១នេះ បន្ទាប់ពីខកខានកាលពីឆ្នាំមុន ក្រោយការផ្ទុះឡើង និងរីករាលដាលនៃវីរុសកូវីដ-១៩ នៅពាសពេញសកលលោក៕